Kaupþing stefnir Vestmannaeyjabæ

Slitastjórn Kaupþings hefur stefnt Vestmannaeyjabæ og krefur hann um rúmlega milljarð króna. Bæjarstjóri Vestmannaeyja segir málið risavaxið fyrir lítið bæjarfélag en eyjamenn geri sjóklárt og undirbúi sig undir dómstólaleið.

Slitastjórn Kaupþings vill að Vestmannaeyjabær endurgreiði peningamarkaðsinnlán sem bærinn tók út 8. september árið 2008 - eða rétt fyrir hrun og þar með notið betri stöðu en aðrir eigendur innlána.

Upphæðin nemur einum milljarði og þrettán milljónum króna.

Elliði Vignisson, bæjarstjóri Vestmannaeyja segir peningana hafa verið í eigu bæjarfélagsins en þeir hafi verið í fjárstýringu hjá Kaupþingi. Hann segir að í stefnu Kaupþings komi fram: „að viðkomandi fjárhæð hafi verið greidd fyrr en eðlilegt var í skilningi laga (134. gr. laga nr. 21/1991) um gjaldþrotaskipti."

„Maður hnýtur náttúrulega um orðalagið að þeir telja að við höfum tekið fjármagnið út óeðlilega snemma," segir Elliði. „Hvort eðlilega snemmt fyrir slitastjórnina hefði þá verið að við hefðum beðið fram yfir hrun og tapað þessum fjármunum. Ég þekki ekki þankaganginn á bak við þessar hugrenningar."



Elliði segir að í bæjarfélaginu hafi það verið hafi verið reynt að taka litla áhættu og ef menn hafi fengið slæma tilfinningu gagnvart fjármálastofnunum hafi fé verið flutt til. Það hafi forðað bæjarfélaginu frá því að tapa peningum í fjármálahruninu. Hann geti þó ekki tjáð sig um þennan tiltekna gjörning þar sem stefnt er að því að málið verði tekið fyrir dóm í september.

Hann segir Vestmannaeyjar lítið sveitarfélag sem óvant sé að takast á við mál sem þessi en stefnt sé að því að nýta tímann vel og verja Vestmannaeyjar þessari vá sem öðrum.

„Við notum tímann núna og gerum sjóklárt þetta eru miklir hagsmunir fyrir okkur og væntanlega fyrir þá sem stefna okkur líka," segir Elliði.