Garðar: Ummælin skrifuð í blindri reiði

Garðar Gunnlaugsson, leikmaður ÍA, sér eftir þeim orðum sem setti inn á Facebook-síðu sína í gærkvöldi en þá gagnrýndi hann Hörð Magnússon, stjórnanda Pepsi-markanna, harkalega.

„Þetta var skrifað í blindri reiði," sagði Garðar í samtali við Vísi í gær. „Ég er auðvitað búinn að sjá að mér enda búinn að taka þennan status út."

„Ég sat í sófanum og var bæði þreyttur og pirraður á því að hafa gert jafntefli í þessum leik. Það er kannski engin afsökun en ég var ekki heldur búinn að borða neitt," sagði hann.

„En það vildi svo til að ég sat með tölvuna í fanginu. Og ég bara missti mig. Það kemur fyrir bestu menn."

„Það virðist sem að ég hafi opnað Pandóruösku með þessum skrifum. Ég vildi ekki að þetta færi svona."

Garðar bað Hörð afsökunar á Facebook-síðunni sinni og hafði einnig í huga að gera það persónulega í dag.