Stefnan að reisa hundrað herbergja hótel

Unnið er að því að leggja einn stærsta golfvöll landsins í Grímsnes- og Grafningshreppi. Þá er stefnt að því að reisa hundrað herbergja hótel við völlinn. Oddviti sveitarstjórnarinnar segir þetta gríðarlega þýðingarmikið fyrir lítið samfélag.

Við minni-borg í Grímsnes og Grafningshreppi er verið að leggja átján holu golfvöll. Framkvæmdin hófst árið 2006 en eins og margt annað stöðvaðist hún í hruninu.

„Síðan hefur þetta verið hálfgert sár í landinu hér í þrjú ár. Og við tókum ákvörðun um það að kaupa landið undir golfvöllinn og halda áfram framkvæmdum til að loka þessu sári," segir Gunnar Þorgeirsson, oddviti hreppsnefndar.

Hann segir það hins vegar ekki vera markmið sveitarfélagsins að eiga eða reka golfvöll og því sé stefnt að því að leigja eða selja landið. Gunnar vonast til þess að hægt verði að slá fyrsta boltann á vellinum árið 2014.

„Ég veit það ekki. Það er kosningarár 2014, svo það er vonandi," svarar hann þegar fréttamaður spyr hvort hann muni slá fyrsta boltann.

Hann segir völlin verða lengsta átján holu golfvöll á landinu. Rauða mölin á svæðinu verður svo nýtt.

„Það er nú kannski það sem verður karakterinn í vellinum að glompurnar verða allar með rauðri möl en ekki hvítum sandi eins og tíðkast annars staðar. Það er kannski afgerandi litur bæði á sumarhúsavegum og glompunum, það er þessi rauða möl sem við búum að því að eiga,"

Þá er stefnt að því að byggja hundrað herbergja hótel við völlinn en sveitarfélagið hefur skrifað undir viljayfirlýsingu þess efnis við fjárfesta.

„Það mál er í vinnslu, verið að klára skipulagsferilinn á þessu. Hann mun klárast á næsta hálfa mánuði eða svo," segir hann.

Framkvæmdin sé mikilvæg fyrir samfélagið í hreppnum.

„Þetta er náttúrlega alveg frábært ef þetta verður að veruleika sko," segir hann.