Ónákvæmni í lyfjagjöfum sjúklinga

Hátt í fimm hundruð tilvik komu upp á Landspítalanum í fyrra þar sem lyfjagjöf til sjúklinga var röng. Sérstök vinna er nú í gangi á spítalanum til að fækka slíkum tilfellum.

Á síðasta ári komu upp 446 atvik þar sem lyfjagjöf til sjúklinga á Landspítalanum var röng.

„Þetta eru ýmiskonar atvik þau lúta að hvernig lyfjafyrirmæli eru, hvernig lyfin eru tekin til og síðan bara þegar sjúklingurinn fær lyfið afhent," segir Ólafur Baldursson, framkvæmdastjóri lækninga á Landspítalanum.

Hann segir atvikin misalvarleg en þau alvarlegustu séu þannig að sjúklingarnir hafi fengið röng lyf.

„Örfá þeirra eru mjög alvarleg og svo allt niður í það að skipta engu máli og allt þar á milli. Þessi alvarlegustu eru sem betur fer mjög fá. Þetta er mjög þekkt vandamál á alþjóðavísu og þekkt á spítölum hér í nágrannalöndunum og í Bandaríkjunum."

Ólafur segir alvarleg lyfjaatvik geta leitt til dauðsfalls.

„Það hefur orðið slíkt atvik á spítalanum fyrir allnokkrum árum síðan."

Ólafur segir að fyrir tveimur árum hafi verið sett í gang sérstakt verkefni til að hvetja starfsmenn til að skrá lyfjaatvik þar sem skortur var á upplýsingum um þau. Núna sé sérstök vinna í gangi á spítalanum til að fækka atvikum sem þessum og er vonast til að henni verði lokið í haust.

„Þarna erum við í sérstöku umbótaverkefni sem snýr að því að bæta fyrirmælin um lyf, lyfjatiltektina sjálfa og síðan það þegar að sjúklingurinn fær lyfið afhent. Þá er lögð áhersla á það við starfsfólkið sem umræðir að það sé vakandi og fylgi alveg sérstökum verklagsreglum til þess að passa að það verði engin mistök. Þetta hermum við eftir bestu spítölum erlendis og fáum sem sagt lánað frá þeim þetta módel og vinnum eftir því og erum viss um að það muni skila árangri."