Gert ráð fyrir 1500 íbúðum á yfirgefnum iðnaðarlóðum

Borgin gerir ráð fyrir hátt í fimmtánhundruð íbúðum á yfirgefnum iðnaðarlóðum í nýju aðalskipulagi sem nú er á lokametrunum. Varaformaður skipulagsráðs segir ekki bara hægt að bjóða upp á einbýlishúsalóðir fyrir efnaða íbúa.

Vinna við aðalskipulag Reykjavíkurborgar er nú langt komin en eitt aðal verkefni skipulagsráðs borgarinnar hefur verið að koma fyrir tuttugu og fimm þúsund nýjum Reykvíkingum sem mannfjöldaspár gera ráð fyrir á næstu átján árum. Það á að gera með því að reisa hátt í fjórtán þúsund og fimm hundruð nýjar íbúðir en þeim á að koma fyrir að mestu vestan elliðaáa með því að þétta byggð.

"Ég hef sagt að Reykjavík á nú þegar mikið af fínum og flottum úthverfum með mjög stórum íbúðum og einbýlishúsum og nú er komið að innhverfunum og hér í kringum okkur er nóg af tækifærum á gömlum aflögðum iðnaðarlóðum að byggja þétt, gefa fleiri kost á að búa í íbúðum miðsvæðis í borginni," segir Hjálmar Sveinsson, varaformaður skipulagsráðs.

Ein af þessum yfirgefnu lóðum er við Héðinshúsið í Vesturbænum en aðrar lóðir eru til dæmis Lýsisreiturinn, Bykoreiturinn og Mýrargötureitur við Slippinn.

"Bara á þessu litla svæði, geta risið um þúsund, jafnvel allt að tólf til fimmtán hundruð íbúðir," segir Hjálmar.

Í heildina er gert ráð fyrir tvö þúsund íbúðum í miðborginni, hátt í sjö þúsund í vatnsmýrinni þar sem flugvöllurinn er í dag og síðan rúmlega þrjú þúsund við Elliðárvog. Þá eru framkvæmdir að hefjast 250 íbúðir við Einholt Þverholt og byrjað að reisa 280 stúdentaíbúðir í vatnsmýrinni við Aragötu. Hjálmar segir að mikil eftirspurn sé eftir litlum íbúðum miðsvæðis á meðan offramboð er af stórum íbúðum í úthverfum.

"Þannig að fólk sem á ekki alltof mikla peninga, við getum ekki vísað því á einbýlishúsalóðir í úthverfunum en við þurfum að byrja hér inni í borginni og við erum í raun byrjuð," segir Hjálmar.