Fá ekki aðgang að gögnum saksóknara

Hæstiréttur Íslands hefur staðfest að sakborningar í al-Thani málinu og verjendur þeirra munu ekki fá aðgang að listum yfir símtöl sem sérstakur saksóknari hleraði við rannsókn málsins. Þeir munu heldur ekki fá aðgang að þeim tölvupóstum sem saksóknari lagði hald á við rannsóknina. Úrskurður Hæstaréttar var kveðinn upp á föstudaginn, en með honum var niðurstaða Héraðsdóms Reykjavikur um sama mál staðfest.

Verjendur sakborninga höfðu krafist þess að fá þessi gögn í hendurnar en sérstakur saksóknari andmælti því og bauð þeim að kynna sér gögnin í húsakynnum sérstaks saksóknara.

Í al-Thani málinu eru þeir Sigurður Einarsson, fyrrverandi stjórnarformaður Kaupþings, Ólafur Ólafsson, einn aðaleigenda bankans, Hreiðar Már Sigurðsson, fyrrverandi forstjóri, og Magnús Guðmundsson, fyrrverandi forstjóri Kaupþings í Lúxemborg, sakaðir um umboðssvik og markaðsmisnotkun með því að selja al-Thani 5% hlut í Kaupþingi í sýndarviðskiptum í því skyni að hækka verð á hlutabréfum í bankanum.