Gera ekki athugasemdir þótt grísir séu geltir án deyfingar

Embættismenn landbúnaðar- og sjávarútvegsráðuneytis virðast leggja blessun sína yfir að gelda megi grísi án deyfingar, drekkja megi dýrum eða kæfa þau með útblæstri véla og hleypa kúm aldrei út úr fjósum.

Í ályktun nýafstaðins aðalfundar Dýralæknafélags Íslands, er þessu harðlega mótmælt, þar sem þetta séu miklar breytingar á drögum að frumvarpi að nýjum lögum um dýravelferð, sem félagið, ásamt dýraverndarráði og Dýraverndarsamtökum Íslands sömdu og lögðu fyrir ráðuneytið. Dýraverndarráð , sem er opinbert ráð, hefur sent Umhverfisstofnun mótmæli mjög í sama dúr og dýralæknarnir og samkvæmt heimildum Fréttastofu ætlar dýraverndarsambandið að gera slíkt hið sama. Auk áðurnefndra atriða hafa embættismennirnir tekið út áhrifaríkt þvingunarúrræði, sem lagt var til í drögunum og var heimild til Matvælastofnunar til þess að skerða eða fella niður ríkisstyrki til þeirra, sem brjóta gegn dýrum.

Í ályktun Dýralæknafélagsins segir að allar þessar breytingar, sem gerðar hafi verið á drögunum séu í andstöðu við fyrstu grein frumvarpsins um velferð dýra, það er að þau séu laus við vanlíðan, hungur, þorsta, ótta, þjáningu, sársauka, meiðsli og sjúkdóma.-