Játaði að hafa slegið mann þremur hnefahöggum í andlit

Karlmaður, sem ákærður hefur verið fyrir líkamsárás, játaði í morgun í Héraðsdómi Reykjavíkur árásina en sagði þó að fórnarlambið hafi átt upptökin að áflogunum. Málið var þingfest í morgun.

Maðurinn er ákærður fyrir að hafa veist að öðrum manni í verslun í Reykjavík síðasta sumar og slegið hann þremur hnefahöggum í andlitið á meðan hann lá ofan á honum. Fórnarlambið hlaut áverka á höfði, tognun og ofreynslu á hálshrygg og áverka á vöðvum og sinum við framarm.

Fórnarlambið fer fram á 300 þúsund í miskabætur.

Aðalmeðferð í málinu fer fram í haust.