Umfjöllun, viðtöl og einkunnir: ÍA - ÍBV 0-4 | Olsen sá um Skagamenn

ÍBV lyfti sér upp í sjöunda sæti Pepsí deildar karla með 4-0 sigri á toppliði ÍA á Skipaskaga í kvöld. Eins og tölurnar gefa til kynna var sigurinn fyllilega verðskuldaður en Christian Steen Olsen fór mikinn og skoraði þrennu í leiknum.

Leikurinn fór fjörlega af stað og bæði lið sóttu hratt og markvisst. Christian Steen Olsen framherji ÍBV sá mikið af boltanum og var ógnandi og sóttu Eyjamenn meira. Skagamenn fengu líka sín færi en um miðbik hálfleiksins datt botninn úr sóknarleik liðanna og fátt markvert gerðist þar til Jón Vilhelm Ákason klúðraði dauðafæri fyrir opnu marki þegar tvær mínútur voru til hálfleiks.

ÍBV hóf seinni hálfleikinn eins og þann fyrri. Liðið var mikið með boltann og sótti af krafti með hraða og gott spil að vopni. Olsen lét finna vel fyrir sér og þeir Þórarinn Ingi og Guðmundur Þórarinsson réðu lögum og lofum á miðjunni.

Það tók ÍBV 18 mínútur að skora í seinni hálfleik og við það brotnuðu heimamenn. Olsen skoraði þremur mínútum síðar og ÍA getur þakkað Páli Gísla Jónssyni markverði sínum að vera enn inni í leiknum þar til á lokamínútunum þegar Olsen bætti tveimur mörkum við auk þess að klúðra vítaspyrnu.

ÍA fékk sín færi þó liðið hafi ekki leikið vel og átt fáar góðar sóknir í leiknum. Heppnin sem verið hefur með liðinu á tímabilinu var ekki með þeim í kvöld og í stað þess að nýta sín færi og koma sér inn í leikinn voru það Eyjamenn sem refsuðu en ÍBV hefði hæglega getað unnið enn stærri sigur.

Fyrsti ósigur ÍA í sumar er staðreynd en liðið er enn á toppi deildarinnar en FH og KR geti komist upp fyrir Skagamenn með sigri í sínum leikjum á morgun. ÍBV er komið úr fallsæti með tveimur sigrum í röð og miðað við leik liðsins í tveimur síðustu leikjum skal enginn afskrifa ÍBV í sumar.

Magnús: Engin stórvægileg breyting á liðinu"Við spiluðum vel allan leikinn og við hefðum hæglega getað skorað fleiri mörk," sagði Magnús Gylfason þjálfari ÍBV í leikslok.

"Það hefur ekki orðið stórvægilega breyting á Eyjaliðinu. Við höfum spilað af svona krafti frá leik tvö. Við höfum verið óheppnir í nokkrum leikjum en svo erum við að fá inn leikmenn eins og Tóta [Þórarinn Inga Valdimarsson] og Tryggva [Guðmundsson] sem eru ógnandi og heilt yfir er liðið að spila massívar en í upphafi og ógna meira.

"Mér fannst þeir aldrei ógna okkur af neinum krafti og það er frábært að koma hingað og mæta liði sem hafði ekki tapað í deildinni og vinna það fjögur núll á þeirra heimavelli. Ég er mjög sáttur"

"Við förum úr botnsætinu í þessari umferð og svo sjáum við hvað það gerir fyrir okkur. Við tökum bara einn leik fyrir í einu. Það er stutt í Gunnar Má [Guðmundsson], það er styrkur að fá hann inn í þetta. Við erum lágvaxnir þegar hann er ekki með og Andri [Ólafsson], það er líka stutt í hann og hann er líka góður í loftinu. Ég vona að við getum styrkt liðið ennþá meira en ég var ánægður með liðið í kvöld," sagði Magnús sem vissi vel að Daninn Christian Steen Olsen gæti skoraði gegn ÍA.

"Þegar hann kom í prufu í vetur þá spiluðum við einmitt gegn ÍA og þá setti hann tvö eða þrjú á þessa vörn. Hann er fljótur og það er frábært þegar hann spilar eins og í kvöld en þetta var liðsheildarsigur umfram annað þó hann hefði hæglega getað skorað meira," sagði Magnús að lokum.

Þórður: Vorum skelfilegir"Þetta var ömurlega lélegt. Við mætum ekki til leiks. Vorum skelfilegir. Þetta er ekki flókið," sagði vægast sagt ósáttur Þórður Þórðarson þjálfari ÍA í leikslok.

"Við gerum ekki það sem er lagt upp með og það sem við erum að æfa. Við gerum ekkert af því í dag. Við fórum vel yfir leikinn síðustu daga og það sem Eyjamenn eru að gera en á meðan menn hlaupa ekki og vinna ekki þá ganga hlutirnir ekki upp," sagði Þórður en ÍA lék án Mark Donninger og Kára Ársælssonar vegna meiðsla.

"Það sást að það er greinilega of mikið að missa þá. Við erum líka með menn eins og Gary Martin, Jóa [Jóhannes Karl Guðjónsson] og Ármann Smára sem hafa lítið sem ekkert getað æft sökum meiðsla sem þeir hafa lent í í leikjum og það hefur klárlega áhrif.

"Samt eiga þessir strákar að geta komið inn og tæklað þetta. Þeir hafa sýnt það í þessum fyrstu leikjum að þeir geta tæklað þetta en hausinn okkar var ekki á Akranesvelli í kvöld.

"Við sköpum okkur einhver færi. Gary Martin á flott skot í slána snemma leiks og ef sá bolti er inni er allt annar leikur svo eigum við tvö þrjú ágætis færi í fyrri hálfleik. Svo í stöðunni 2-0 fáum við dauðafæri og mark þar hefði auðvitað breytt leiknum.

"Við tökum séns í stöðunni 2-0, þá setjum við Ármann Smára fram og breytum í þriggja manna vörn. Það skiptir engu máli hvort maður tapar 2-0 eða 4-0 en þetta var ömurlega lélegt, Palli [Páll Gísli Jónsson] stóð fyrir sínu en ég myndi ekki velja markmann í liði sem tapar 4-0 mann leiksins," sagði Þórður glottandi við tönn að lokum.