Skuldatryggingaálag Íslands aftur yfir 300 punkta

Skuldatryggingaálag Íslands fór yfir 300 punkta í morgun en slíkt gerðist síðast í janúar s.l. Mælist álagið nú 304 punktar.

Þessi hækkun á álaginu er eingöngu vegna þess að skuldatryggingaálag ríkja í Vestur Evrópu hefur almennt hækkað mikið að undanförnu vegna erfiðleikanna sem ríkja á evrusvæðinu. Ísland aftur á móti er í góðum málum efnahagslega miðað við önnur lönd í Evrópu. Meðalálagið í Vestur Evrópu er komið í 314 punkta en ef Grikkland er tekið út nemur meðaltalið 277 punktum.

Þetta kemur fram í Morgunkorni greiningar Íslandsbanka. Þar segir að Grikkland bjagar meðaltalið verulega og má hér nefna að í lok dags í gær stóð það samkvæmt gögnum úr Bloomberg-gagnaveitunni í 8.751 punktum.

Skuldatryggingaálagið hefur nánast undantekningalaust hækkað á öllum ríkjum Vestur Evrópu á síðustu dögum, og hefur álagið að jafnaði verið hærra í maímánuði en síðustu mánuði. Í þessum samanburði er það hæst á Portúgal, og stóð áhættuálagið á það í lok dags í gær í 1.170 punktum. Þar á eftir koma önnur evruríki sem einnig hafa verið í hvað mestum skuldavanda, eins og Írland (723 punktar), Spánn (599 punktar) og svo Ítalía (565 punktar).