Framtíð Lýsingar í húfi

Hæstiréttur kveður í dag upp dóm í máli fjármögnunarfyrirtækisins Lýsingar gegn Smákrönum. Málið snýst um það hvort gengistrygging svokallaðra fjármögnunarleigusamninga hafi verið lögleg eða ekki. Smákranar héldu því fram að gengistrygging lánssamningsins væri ólögleg og stefndi því Lýsingu fyrir Héraðsdóm Reykjavíkur. Dómur þar féll Smákrönum í hag en Lýsing undi ekki dómsniðurstöðunni og áfrýjaði því málinu til Hæstaréttar.

Hæstiréttur hefur þegar dæmt að fjármögnunarleigusamningar sem Kraftvélaleigan gerði við Glitni banka í aðdraganda bankahrunsins hafi verið ólöglegir samningar. Lýsing heldur því aftur á móti fram að þeir samningar sem fyrirtækið gerði við sína viðskiptavini séu ekki sambærilegir þeim samningum sem Glitnir gerði við sína viðskiptavini.

Lýsing gerði um 6500 fjármögnunarleigusamninga við viðskiptavini sína og upphæðin skiptir milljörðum. Í ársskýrslu Lýsingar fyrir árið 2010 er minnst á málaferli Smákrana gegn Lýsingu. Í ársskýrslunni segir að fari svo að gengistrygging þeirra verði dæmd ólögmæt megi gera ráð fyrir að það hafi neikvæð áhrif á rekstur og efnahag félagsins og óvissa kunni þá að ríkja um rekstrarhæfi þess.