Ólafur: Kominn í mitt besta form

„Það er mjög sérstakt að vera kominn aftur til Kölnar," sagði Ólafur Stefánsson á blaðamannafundi fyrir úrslitahelgi Meistaradeildar Evrópu í Köln í gær.

Ólafur hefur unnið Meistaradeildina fjórum sinnum með tveimur félögum - Ciudad Real og Magdeburg. Hann var frá vegna meiðsla í upphafi tímabilsins og missti af þeim sökum af EM í Serbíu í janúar.

„En sem betur fer er ég aftur kominn í mitt besta form nú þegar mest á reynir," sagði hann.

Ólafur leikur sem kunnugt er með danska liðinu AG en liðið hefur slegið í gegn Meistaradeildinni í vetur. „Við erum bara 120 mínútur frá titlinum. En þetta verða mjög langar 120 mínútur og mjög brött brekka."

Ólafur mætir sínu gömlu liðsfélögum í Atletico Madrid í undanúrslitum en liðið hét áður Ciudad Real. Ólafur lék með liðinu í sex ár og varð þrívegis Evrópumeistari með liðinu.

„Mér þykir það leitt að annað félagið muni ekki komast í úrslitin. Ef við vinnum verða tilfinningarnar mínar blendnar því ég átti frábær ár hjá Ciudad Real. En þetta snýst ekki um mig heldur liðið og félagið. Við höfum sett okkur háleit markmið."