Óljóst hvenær Björk byrjar að syngja á ný

Alveg óljóst er hvenær Björk Guðmundsdóttir mun geta sungið opinberlega að nýju, segir Guðmundur Gunnarsson faðir hennar. Björk hefur verið í hvíld frá tónleikahaldi að undanförnu að læknisráði en læknar fundu hnúð á raddböndum hennar.

Á vefsíðunni efestivals.co.uk er fullyrt að Björk hafi aflýst öllum tónleikum sínum fram eftir sumri, meðal annars á Hróarskelduhátíðinni í Danmörku og stórum hátíðum á Spáni og í Portúgal. Guðmundur segist ekki geta staðfest þetta.

„Ég var í sambandi við hana í gær og þá var ekki alveg ljóst hversu lengi það ætti að vera," segir Guðmundur og bætti því við að hann teldi að enginn vissi hversu lengi þetta ástand myndi vara.