Rétt að endurskoða reglur og siði um komu flóttamanna

Ögmundur Jónassson, innanríkisráðherra, telur rétt að endurskoða reglur og siði varðandi komu flóttamanna hingað til lands. Þetta kom fram í máli ráðherra á Alþingi í morgun þegar rætt var um alsírsku drengina sem voru handteknir á Keflavíkurflugvelli í síðasta mánuði. Þingmaður Samfylkingarinnar dregur í efa að barnaverndarsáttmáli Sameinuðu þjóðanna hafi verið virtur í málinu.

Mörður Árnason, þingmaður Samfylkingarinnar, spurði Ögmund út í málefni alsírsku drengjanna sem voru handteknir á Keflavíkurflugvelli í síðasta mánuði.

Mörður sagði augljóst að mistök hafi átt sér stað í kerfinu. „Það eru auðvitað lög og reglur í landinu. Ég dreg í efa að hér hafi verið farið að flóttamannasamningum og ég dreg líka í efa að hér hafi barnaverndarsáttmálinn verið virtur," sagði Mörður.

Ögmundur sagði það vera mat innanríkisráðuneytisins að ekki hafi verið brotið gegn flóttamannasamningi Sameinuðu þjóðanna í þessu tilviki. Atvikið kalli hins vegar á endurskoðun á þeim reglum og siðum sem fylgt er í málum af þessu tagi.

„Íslenskt ákæruvald sem í þessu tilviki var lögreglustjórinn á Suðurnesjum það fer samkvæmt lögum og reglum og hefðum. og ég tek undir með háttvirtum þingmanni að þetta regluverk og þessar hefðir þurfum við að skoða," segir Ögmundur.