Skemmtiferðaskip sigldi framhjá skipbrotsmönnum

Sjómaður frá Panama, sem lifði það af að vera 28 daga á reki á Kyrrahafi, hefur kært eigendur skemmtiferðaskips sem sigldi fram hjá honum og tveimur félögum hans. Hinir skipverjarnir tveir fórust báðir en Adrian Vasquez lifði af og hefur nú kært skipafélagið fyrir rétti í Flórída.

Skipafélagið sem er bandarískt, hefur beðið manninn afsökunar en segir að mistök hafi orðið til þess að skiptstjóranum var ekki gert viðvart. Farþegar um borð sáu mennina á vélarvana bát sínum og létu áhafnarmeðlimi vita, en félagið segir að skipstjórinn hafi aldrei fengið að vita af málinu.