Segjast hafa fellt tugi sýrlenskra hermanna

Uppreisnarmenn í Sýrlandi fullyrða að 23 stjórnarhermenn hafi fallið í borginni Rastan í morgun. Þá segir að tugir séu særðir en þrír herflutningabílar voru sprengdir í loft upp í árás uppreisnarmanna.

Árásin var gerð til að svara sókn stjórnarhersins inn í borgina um helgina en tugir hafa særst í loftárásum hersins. Talið er að 30 hafi fallið í bardögum í gær víðsvegar um landið en vopnahlé sem komið var á fyrir mánuði hefur engin áhrif haft til að lægja ófriðaröldurnar í landinu.

Sameinuðu þjóðirnar telja að níu þúsund manns hafi fallið í Sýrlandi frá því uppreisnin gegn forsetanum hófst fyrir rúmu ári.