Kartöflubændur komu í veg fyrir stórtjón

Kartöflubændur á Hornafjarðarsvæðinu, sem er eitt af mestu kartöflusvæðum landsins, náðu flestir eða allir að verjast stórtjóni af óveðrinu með vökvun.

Þeir eru búnir að setja allt niður í garða sína, en í gær fór mikill sand- og moldarmökkur að stíga upp frá görðunum þannig að hætt var við að jarðvegur fyki ofan af útsæðinu.

Gripu þeir þá til vökvunar í stórum stíl með afkastamiklum haugsugum, sem þeir drógu á dráttarvélum sínum um garðana, þannig að ferskar Hornafjarðarkartöflur koma á markaðinn á réttum tíma í sumar.