Sigurður Einarsson þarf að greiða Kaupþingi 500 milljónir

Héraðsdómur Reykjavíkur komst í dag að þeirri niðurstöðu að Sigurður Einarsson fyrrverandi stjórnarformaður Kaupþings skuli greiða þrotabúi bankans til baka 496 milljónir króna auk vaxta vegna persónulegra ábyrgða á lánum til hans sem felldar voru niður fyrir hrun bankans.

Sú ákvörðun var tekin af stjórn bankans, þann 25. september 2008, fjórtán dögum áður en bankinn fór í þrot. Á þeim tíma námu heildarlánveitingar til æðstu stjórnenda bankans 64 milljörðum króna. Slitastjórn bankans rifti síðar ákvörðuninni en bauð þeim sem höfðu fengið lánin að endurgreiða stóran hluta þeirra eða semja um uppgjör. Nokkrir fyrrverandi stjórnendur bankans sem hæst lán fengu, þar á meðal Sigurður, neituðu að semja við slitastjórn um endurgreiðslu og fóru mál þeirra því fyrir dómstóla.

Heildarlán Sigurðar hjá bankanum námu yfir fimm milljörðum króna.

Þá var staðfest kyrrsetningargerð sýslumannsins í Reykjavík sem fram fór í júlí í fyrra um kyrrsetnginu eigna Sigurðar hér á landi. Skulu þær eignir ganga upp í skuldina en um er að ræða eignarhluta Sigurðar í einbýlishúsi á Seltjarnarnesi, landareign í Stíflisdal, sumarhúsi á sama stað og eignarhluta í félaginu Hvítsstaðir ehf.

Málskostnaður var felldur niður í málinu.