Vill að þjóðin kjósi um aðildarviðræður að ESB

Þjóðin þarf að fá að taka afstöðu um aðild að evrópusambandinu fyrir næstu þingkosningar, jafnvel þótt aðildarsamningur liggi þá ekki fyrir. Þetta sagði Svandís Svavarsdóttir umhverfisráðherra í fyrirspurnartíma á Alþingi í dag.

„Það er að segja að þjóðin fái að taka afstöðu til þeirra efnislegu þátta sem þá liggja fyrir í samskiptum Íslands og Evrópusambandsins því það er ótækt að draga það ferli meira á langinn en svo og þjóðin þarf að koma að því máli. Því miður er ekki endilega útlit fyrir það að við verðum með samning í höndunum en þjóðin þarf sannarlega á þessu kjörtímabili að fá aðkomu að því að geta tekið afstöðu til aðildar að evrópusambandinu. Ég held að það sé mikilvægt fyrir framtíðina,“ sagði Svandís á Alþingi. Svandís sagði að staða Evrópu væri mjög flókin og vandasöm og vandséð að það sé skynsamlegt fyrir Ísland að ganga í Evrópusambandið núna.

Það var Illugi Gunnarsson, þingmaður Sjálfstæðisflokksins, sem spurði Svandísi út í afstöðu hennar í málinu. Eftir að Svandís hafði svarað sagði Illugi að yfirlýsingar hennar fælu í sér stórpólitísk tíðindi.