Almannavarnir: Allt bendir til þess að flugvélin geti lent eðlilega

Búið er að skoða hjólabúnað flugvélarinnar samkvæmt tilkynningu frá almannavörnum. Allt bendir til að vélin geti lent á eðlilegan hátt. Enn er þó verið að eyða eldsneyti til að létta vélina fyrir lendingu sem er áætluð kl. 20:35.

Aðstandendum er bent á að hringja í síma 1717 til að afla frekari upplýsinga en ekki í 112.

Við flugtak flugvélar Icelandair nú síðdegis féll eitt af fjórum hjólum úr aftara hjólastelli. Flugvélinni var snúið við til lendingar á Keflavíkurflugvelli og flugslysaáætlun vallarins virkjuð. Flugvélin hefur sveimað um í nágrenni Keflavíkurflugvallar til að eyða eldsneyti.