Samhæfingarstöð Almannavarna áfram starfandi vegna vélarvana báts

Landhelgisgæslunni barst kl. 21:25 í kvöld aðstoðarbeiðni frá neta- og dragnótabát, með tíu manns í áhöfn sem var vélarvana á Meðallandsbug norðan við Skarðsfjöruvita og rak í átt að landi eins og greint var frá á Vísi fyrr í kvöld.

Samstundis voru kallaðar út tvær þyrlur Landhelgisgæslunnar og er önnur þeirra í biðstöðu í Reykjavík samkvæmt tilkynningu frá gæslunni.

Einnig voru kölluð út björgunarskip Slysavarnarfélagsins Landsbjargar í Vestmannaeyjum og á Höfn í Hornafirði auk björgunarsveita á Suðurlandi sem fóru niður í fjöruna og eru þar í viðbragðsstöðu. Einnig voru nærliggjandi skip beðin um að halda á staðinn.

Skipverjar létu akkeri falla kl. 21:52 þegar skipið var um 1 sjómílu undan landi og hefur skipið ekki hreyfst úr stað síðan það var gert. Von er á skipi til aðstoðar eftir um eina klukkustund en þyrla Landhelgisgæslunnar kom á staðinn um kl. 23:10 og lenti hún á staðnum, bíða þeir nú átekta ásamt björgunarsveitum ef á þarf að halda. Vegna aðgerðarinnar var ákveðið að Samhæfingarstöð Almannavarna í Skógarhlíð yrði áfram starfandi en fulltrúar hennar voru enn á staðnum eftir flugatvikið á Keflavíkurflugvelli.