Vill leggja niður skattkortakerfið

Gömlu góðu skattkortin gætu heyrt sögunni til nái hugmyndir ríkisskattstjóra fram að ganga en hann vill leggja skattkortakerfið niður í núverandi mynd. Hann segir það barn síns tíma og ný tækni geti haldið utan um persónuafslátt í framtíðinni.

Skattkortin þekkjum við öll, bláu pappírsmiðana sem halda utan um persónuafslátt og flytja þarf milli vinnuveitanda þegar skipt er um starf. Oft hafa komið upp hugmyndir um breytingar á þessu tuttugu og fimm ára kerfi til dæmis að gera það rafrænt. Skúli Eggert Þórðarson ríkisskattstjóri vill ganga enn lengra.

„Þær hugmyndir sem núna er verið að vinna með gera ráð fyrir því að við munum leggja skattkortakerfið af á næstu árum og það verði sett í vald launagreiðenda sjálfra að ákveða persónuafslátt en með virkueftirliti frá ríkisskattstjóra og eftir atvikum launamanni sjálfum," segir Skúli.

Hann segir breytinguna kunna að hljóma flókna í framkvæmd en hún muni auka hagkvæmni þar sem flestir launamenn eru hjá sama launagreiðanda auk þess sem launakerfin eru mun betri.

„Ég held að það séu flestir sammála um það að þetta kerfi sem notað er í dag sé barn síns tíma og þurfi breytingar, hins vegar hafa verið það miklar breytingar í umhverfi skattamála og breytingar á skattalögum síðustu 3-4 ár að við höfum hreinlega ekki haft tíma í að hugleiða hvernig við gætum gert þessar breytingar."

Innleiðing á breyttu kerfi þarfnast lagabreytingar og innleiðingar og segir hann að það geti tekið nokkur ár.

„Það er okkar skoðun að þetta myndi fyrst og fremst skapa meiri hagkvæmni hjá launagreiðendum sem eru að sýsla með þessi kort og auðvitað þægindi fyrir fólk að þurfa ekki að standa í því að vera að færa skattkort á milli," segir Skúli.