Hvað kostar að byggja pall? - samanburður risanna þriggja

Segja má að byggingavöruverslunin Bauhaus hafi kastað sprengju inn á markaðinn þegar tuttugu og tvö þúsund fermetra verslun var loks opnuð um helgina.

Hinir risarnir Byko og Húsasmiðjan, hafa upp á síðkastið farið í ímyndar og markaðsátak og greinilegt að samkeppnin er mikil.

Við ákváðum að gera verðsamanburð á milli risanna þriggja.

Ég fór því á stúfana og hafði samband við risana þrjá, kynnti mig sem fréttamann og sagðist þurfa að byggja pall og fá nokkra aukahluti. Greinilegt var að ég var kominn inn á ákveðið sprengjusvæði þar sem menn voru sakaðir um óheiðarleika áður en niðurstaðan var ljós. Eitt áttu þeir þó allir sameiginlegt. Allir segjast þeir vera með besta verðið.

Hitalamparnir eru ekki komnir til Bauhaus og því vantar þá tölu inn í heildarpakkann. En miðað við þessar forsendur er ljóst að besta verðið fengum við í Húsasmiðjunni. Þess ber að geta að allar verslanirnar bjóða upp á verðvernd og afslætti sem eru mismunandi.

Tekið skal fram að ekki er um sömu vörur að ræða í verslununum þremur og þær eru mismunandi að gæðum. Ég bað einungis um það ódýrasta.



-----------------------------------

Verðtilboð Risanna þriggja

Húsasmiðjan

Við gefum þér tvö tilboð í 100fm sólpall, annar er lagður beint á frostfrítt undirlag(jarðveg) og er þess vegna ódýrari kostur, hinn er hefðbundinn sólpallur með öllum undirstöðum og festingum. (Sjá tilboðin tvö í meðfylgjandi myndaalbúmi)

Ódýrasta gasgrillið sem fæst í versluninni

Vnr. 3000391 kr. 12,900

Borð og stóla á pallinn fyrir fjóra

Vnr.3899211 kr. 19,900

Tvo sólbaðslegubekki

Vnr. 3899229 kr. 6,990 kr/stk = 13980 kr fyrir 2 stk

Tvo gaslampa (til að halda hita á köldum síðkvöldum)

Vnr. 2999748 Reyndar ekki gas heldur rafmagn. 10.420 kr en 9,899 kr fyrir Kjaraklúbbsmeðlimi

Samtals: 57.200 kr

Pallatilboð 1: 421.253 kr

Heildarverð Húsasmiðjunnar: 478.453

Verðtilboðin frá Byko og Bauhaus má sjá í meðfylgjandi myndaalbúmi.

-----------------

Viðbót

Í verðtilboðum aðilanna þriggja er um mismunandi magn að ræða í sumum liðum. Þannig er gert ráð fyrir 320 kg af sementi í tilboði Byko en 40 kg hjá hinum tveimur. Verðtilboð Byko lækkar því um 12.012 kr. sé miðað við sama magn af sementi.

Líkt og tekið er fram í fréttinni bjóða aðilarnir þrír upp á mismunandi afslætti. Þannig er listaverð Húsasmiðjunnar hærra en hjá keppinautunum en verðstefna þeirra gengur út á það að verðlauna þá sem kaupa mikið magn. Það var gert í þessu tilfelli og því kemur afslátturinn inn í tilboðið.

Eins og sjá má á verðtilboðinu frá Byko, sem fylgir þessari frétt, er tilboðsafslátturinn sérstaklega tiltekin, 22.750 kr. og ber að horfa til þess.

Það skal ennfremur áréttað hér að líkt og fram kemur í fréttinni er ekki verið að bera saman sömu vörur á milli verslananna þriggja. Forsendurnar voru hinsvegar þær sömu. Óhandlaginn maður sem ætlar að reisa 100 fermetra pall og ætlar að fá sér nokkra hluti á pallinn.

Af samtölum við þá sem til þekkja getur það verið mjög misjafnt hvernig menn byggja pall, hvað þeir vilja steypa langt niður og hversu mikið magn af efni er notað í pallinn til dæmis.

Þeir sem hyggja á slíkar framkvæmdir eru því hvattir til þess að kynna sér málið ennfrekar.