Endurútreikningar gengislána ekki í sjónmáli

Endurútreikningar á tugþúsundum ólölegra gengislána eru ekki í sjónmáli. Fjármálafyrirtækin hyggjast ekki reikna lánin út að nýju eftir nýjasta gengislánadóminn- heldur fara í fleiri dómsmál til að skera úr um óvissu sem þau telja enn ríkja um útreikninga lánanna.

Ragnar Hall hæstaréttarlögmaður hefur krafist þess við Héraðsdóm Reykjavíkur að slitastjórn Frjálsa fjárfestingarbankans verði vikið frá störfum. Krafan verður tekin fyrir á næstu dögum. Krafan er sett fram vegna þess að umbjóðendur hans, hjón í Vesturbænum sem unnu mál gegn slitastjórninni um miðjan febrúar fyrir Hæstarétti, hafa nú, þremur mánaðamótum síðar, enn ekki fengið endurútreikning í samræmi við dóminn. Ragnar segir svör slitastjórnar ýmist hafa verið „hreinir útúrsnúningar eða alls engin".

Hlynur Jónsson, formaður slitastjórnar, óttast ekki að verða vikið frá störfum, dómkröfur hjónanna í Vesturbænum hafi verið að fullu efndar af hálfu slitastjórnar. Eina sem út af standi sé endurútreikningur eftir seinni gengisdóminn. Ekki eitt einasta gengislán hafi verið endurreiknað eftir þann dóm, enda hafi Hæstiréttur ekki kveðið á um hvernig haga beri endurútreikningi, að mati Hlyns, ekki einu sinni í tilviki hjónanna í Vesturbænum.

Sigurður Hreinn Sigurðsson, sem vann málið í febrúar, er mjög ósáttur við framferði slitastjórnar og telur hana ekki í þágu viðskiptavina heldur einvörðungu til að hámarka hagnað þrotabúsins.

Hlynur telur að eina leiðin til að skera úr um hvernig beri að endurreikna lán hjónanna og annarra sé að fara í enn frekari dómsmál. Lausn sé því ekki í sjónmáli og endurreikningar ekki væntanlegir á næstu mánuðum.