Þóra með átta prósentustiga forskot á Ólaf Ragnar

Þóra Arnórsdóttir nýtur mests stuðnings hjá þeim sem tóku þátt í könnun Vísis á fylgi þeirra sem lýst hafa yfir framboði til forseta. Könnunin stóð frá föstudegi og fram á mánudag og var þáttakan gríðarlega góð.

Tæplega átta þúsund manns tóku þátt og fékk Þóra 43 prósent atkvæða en Ólafur Ragnar Grímsson forseti nýtur stuðnings 35 prósenta. Ari Trausti Guðmundsson fær 14 prósent atkvæða og Herdís Þorgeirsdóttir fimm prósent. Ástþór Magnússon fær tvö prósent og fylgi þeirra Jóns Lárussonar og Hannesar Bjarnasonar er vart mælanlegt.

Það munar því átta prósentustigum á fylgi Þóru og Ólafs. Þá vekur athygli árangur Ara Trausta en hann lýsti yfir framboði í síðustu viku, daginn áður en könnunin hófst.

Alls voru 7874 atkvæði greidd í könnuninni og röðuðust þau þannig:

Ari Trausti Guðmundsson	1145 atkvæði	15%
Ástþór Magnússon	148 atkvæði	2%
Hannes Bjarnason	32 atkvæði	<1%
Herdís Þorgeirsdóttir	354 atkvæði	5%
Jón Lárusson	38 atkvæði	<1%
Ólafur Ragnar Grímsson	2755 atkvæði	35%
Þóra Arnórsdóttir	3400 atkvæði	43%

Aðeins eitt atkvæði var tekið gilt frá hverri IP-tölu.

Á það ber að benda að könnun Vísis samræmist ekki viðurkenndri aðferðarfræði við gerð skoðannakannana þar sem úrtakið er valið með viðurkenndum aðferðum sem ganga út á að endurspegla þýðið á sem nákvæmastan hátt. Könnunin endurspeglar því aðeins skoðanir lesenda Vísis sem ákváðu að taka þátt í henni.