Þórey Rósa skoraði þrjú mörk og efsta sæti riðilsins tryggt

Þórey Rósa Stefánsdóttir skoraði þrjú mörk fyrir Team Tvis Holstebro sem lagði Randers að velli 35-29 í dag í úrslitakeppni danska handboltans.

Jafnt var í hálfleik 17-17 en heimakonur sigu fram úr í síðari hálfleik og unnu sex marka sigur. Rut Jónsdóttir er einnig á mála hjá liðinu en var ekki meðal markaskorara í dag.

Team Tvis Holstebro hafði þegar tryggt sér sæti í undanúrslitum. Með sigrinum tryggði liðið sér efsta sætið í sínum riðli úrslitakeppninnar og ljóst að liðið mætir Viborg í undanúrslitum.

Fyrsti leikur liðanna fer fram á miðvikudag.