ÁTVR seldi áfengi og tóbak fyrir 25 milljarða

Heildartekjur ÁTVR á síðasta ári voru 25,4 milljarðar. Þar af voru tekjur af sölu áfengis 17 milljarðar og tekjur af sölu tóbaks 8,4 milljarðar.

Hagnaður ÁTVR á síðasta ári var rúmlega 1,2 milljarðar króna. Samdráttur í sölu áfengis var 2,7% og samdráttur í sölu tóbaks var 4,9%. Þrátt fyrir samdráttinn er afkoman með því besta frá árinu 2002 en þá var innheimtu tóbaksgjalds breytt og gjaldið ekki lengur hluti af hagnaði fyrirtækisins.

Síðastliðið ár er þriðja samdráttarárið í röð, en samdráttur í sölu áfengis var 2,7% og samdráttur í sölu tóbaks var 4,9%. Árið 2008 þegar salan í lítrum fór hæst voru seldir 20.387.345 lítrar. Árið 2011 voru seldir 18.437.968 lítrar. Samtals nemur samdrátturinn á þessum þremur árum tæpum tveimur milljónum lítra eða um 10%. Er það verulegur samdráttur og verður að fara aftur til ársins 2006 til þess að finna sambærilega sölu.

Tóbakssalan hefur dregist enn meira saman. Heildarsamdrátturinn í sölu vindlinga á síðustu þremur árum nemur um 47.607 þúsund stykkjum eða um 15, 7%. Á sama tíma hefur ársverkum hjá ÁTVR fækkað um 45.