Meistaraþjálfarinn aftur tekinn við HSV Hamburg | Byrjar á móti Degi

Martin Schwalb, sem gerði HSV Hamburg að þýskum meisturum í handboltanum í fyrra en fékk ekki að halda áfram með liðið, er aftur orðinn þjálfari liðsins.

Per Carlén tók við liðinu af Schwalb síðasta vor en var síðan rekinn í desember. Aðstoðarmaður Carlén, Jens Häusler, hefur stýrt liðinu síðan að Svíinn fékk að fjúka.

Martin Schwalb var búinn að starfa sem forseti félagsins frá því að hann gerði liðið að meisturum en eftir tap á móti Flensburg um síðustu helgi ákvað hann að taka aftur við liðinu.

Fyrsti leikur Martin Schwalb með liðið verður á móti Degi Sigurðssyni og lærisveinum hans í Füchse Berlin í sextán liða úrslitum Meistaradeildarinnar á morgun.