Á að hafa aflað sér gagna um fjármál þingmanns með ólögmætum hætti

Stjórn Fjármálaeftirlitsins ákvað að kæra Gunnar Andersen forstjóra stofnunarinnar til lögreglu fyrir að afla sér gagna um fjármál Guðlaugs Þórs Þórðarsonar þingmanns með ólögmætum hætti. Starfsmaður Landsbankans mun samkvæmt heimildum hafa komið með gögnin heim til Gunnars í fyrradag. Þetta kom fram í hádegisfréttum RÚV.

Þar segir ennfremur að samkvæmt yfirlýsingu stjórnar FME barst þeim atvikið til eyrna í gær. Steinþór Pálsson bankastjóri Landsbankans vildi hvorki neita né játa að umrædd atvik hafi átt sér stað, málið væri í lögreglurannsókn. Lögregla staðfestir að sér hafi borist kæra frá stjórn Fjármálaeftirlitsins.

Ekki er ljóst hvaða upplýsingar um ræðir, en því var haldið fram í hádegisfréttum RÚV að um væri að ræða frétt DV um um að eignarhaldsfélag Guðlaugs Þórs hefði fengið greiddar tæpar 33 milljónir króna frá Landsbanka Íslands í júní árið 2003. Það er ekki rétt og hefur verið leiðrétt.