Þýsku dómararnir dæma aftur hjá Íslandi

Þýska dómaraparið sem dæmdi leik Íslands og Króatíu á mánudagskvöldið munu dæma viðureign Íslands og Slóveníu í kvöld.

Óvenjulegt er að sama parið dæmi svo leiki hjá sama liðinu í riðlakeppninni en þeir dæmdu síðast leik Spánar og Ungverjalands í C-riðli.

Þýsku dómararnir komust ágætlega frá síðasta leik Íslands en dæmdu reyndar umdeilt víti á íslensku vörnina þegar að Ivano Balic var við það að sleppa í gegn á lokamínútunni. Með vítinu komust Króatar í tveggja marka forystu og fóru langt með að tryggja sér sigurinn.

Það verður þó ekki við þá sakast enda réði mestu að markvörður Króata, Mirko Alilovic, varði nánast allt sem á markið kom á síðustu mínútum leiksins.