Hlynur og Anton áttu að fá leik í dag

Þeir Hlynur Leifsson og Anton Gylfi Pálsson hefðu átt að dæma í dag á Evrópumeistaramótinu í Serbíu en veikindi Hlyns komu í veg fyrir það.

Þetta kom fram í Morgunblaðinu í dag. Hlynur sagði að þeim hafi verið tilkynnt að þeir myndu fá leik í dag en þá fara fram leikir í undanúrslitum sem og leikur um fimmta sæti mótsins.

En svo veiktist Hlynur og því gátu þeir ekki gefið kost á sér. „Þessu móti er lokið hjá okkur. Svona er þetta og maður verður bara að taka þessu," sagði Hlynur en þeir höfðu dæmt þrjá leiki á mótinu og staðið sig vel.

„Við höfum fengið mjög góða dóma fyrir okkar leiki. Menn hafa verið mjög ánægðir með okkur. Það hefur verið frábært að vera hérna."