Landsliðið heiðrar Paul Motian í Norræna húsinu

Landslið íslenskra jazzleikara leikur í minningu trommarans Paul Motian, sem féll frá 22. nóvember, í Norræna húsinu á fimmtudag.

Bandaríski trommarinn Scott McLemore, sem er búsettur á Íslandi, hefur skipulagt tónleika þar sem tónsmíðum Motian's verður gert skil. Segja má að landslið íslenskra jazzleikara mun þar votta Motian virðingu sína en fram koma Einar Scheving, Óskar Guðjónsson, Jóel Pálsson, Sigurður Flosason, Haukur Gröndal, Ólafur Jónsson, Sunna Gunnlaugs, Agnar Már Magnússon, Kjartan Valdimarsson, Andrés Þór Gunnlaugsson, Hilmar Jensson, Guðmundur Pétursson, Þorgrímur Jónsson og fleiri.

Í tilkynningu segir: „Motian er best þekktur fyrir leik sinn í hinu goðsagnakenndu tríói píanistans Bill Evans með Scott LaFaro, sem snéri jazzheiminum á hvolf með frjálsri nálgun sinni á 6. og 7. áratugnum. En Motian hafði þá þegar myndað sinn einstaka hljóm á trommunum. Það var hins vegar árið 1972 sem hann byrjaði að semja lög að hvatningu Manfred Eicher's eiganda ECM útgáfunnar. Motian hafði leikið með tríói píanistans Keith Jarrett í nokkur ár og til að hafa hljóðfæri til að semja á keypti hann gamalt píanó af Jarrett. Það kom fljótt í ljós að tónsmíðar áttu vel við hann og árið 1977 hljóðritaði tríó Keith Jarrett's hjómplötu þar sem Motian átti allar tónsmíðar nema eina. Motian hljóðritaði svo 35 plötur í eigin nafni fyrir hinar ýmsu útgáfur og lék inn á óteljandi hljóðritanir sem meðleikari.

Motian hljóðritaði ekki bara eigin lög heldur hafði ástríðu fyrir gömlum standördum úr bandarísku söngleikjabókinni. "On Broadway" var verkefni tileinkað söngleikjalögum og "Electric Bebop Band" kastaði nýju ljósi á tónsmíðar Charlie Parker, Bud Powell og Thelonious Monk.

Sem meðleikari lék Paul Motian með nær öllum bestu jazzleikurum sögunnar frá fyrrnefndum Bill Evans og Keith Jarrett til Lee Konitz, Stan Getz og jafnvel stuttlega með Thelonious Monk. Paul Motian var með vakandi auka á jazzsenunni og sífellt að leita að ungum og efnilegum leikurum sem hann gaf tækifæri í hljómsveitum sínum."

Tónleikarnir verða í Norræna Húsinu fimmtudaginn 19. janúar klukkan 21 og er aðgangseyrir 1500 krónur.