Flugumferðarstjóri er svefnlaus við höfnina

„Það sem maður heyrir mest er þegar stórir málmhlutar annaðhvort falla hver á annan eða lemjast saman. Það gellur í öllu og það er mikið ónæði af því að þetta er svo nálægt okkur,“ segir Hrannar Hallgrímsson, flugumferðarstjóri og íbúi á Norðurbakka við Hafnarfjarðarhöfn.

Hrannar gerir athugasemdir við starfsemi fyrirtækisins Furu, sem í sumar fékk tímabundið leyfi til niðurrifs á skipinu Lenu í Hafnarfjarðarhöfn. Niðurrifsstarfsemin fer fram gegnt Norðurbakka, við innsiglinguna í innri höfnina.

„Við höfum búið hér í eitt og hálft ár og erum vön að það sé ónæði af höfninni sjálfri en þegar menn eru farnir að rífa í sundur heil skip með stórum vinnutækjum árla morguns og jafnvel snemma um helgar er það farið að hafa áhrif,“ segir Hrannar, sem í erindi sínu til bæjaryfirvalda segir starfsemina sérstaklega slæma fyrir sig því hann vinni vaktavinnu og treysti á að ná svefni yfir daginn.

„Þetta tilraunaverkefni er farið að valda mér svefnleysi,“ segir Hrannar í athugasemdinni. Aðspurður neitar hann því þó að vera beinlínis vansvefta. „Það er kannski ekki svo slæmt en þar sem þetta er tilraunaverkefni vildi ég benda á að þetta væri svo sem í lagi með eitt skip en ef þeir gerðu þetta í meiri mæli sæi maður fram á meira ónæði og truflun. Maður er ekkert hrifinn af því til framtíðar,“ útskýrir hann.

Heilbrigðiseftirlitið hefur farið í nokkrar vettvangsferðir til að kanna hugsanlega hávaðamengun og aðra mengun frá framkvæmdinni hjá Furu, sem sögð er hafa tekist vel. Ábending Hrannars hafi því komið nokkuð á óvart.

„Í fyrstu tveimur ferðunum drukknaði hávaði frá skipinu algjörlega í hávaða sem barst frá flutningaskipinu Leah frá Hollandi,“ segir heilbrigðiseftirlitið í bréfi til Hafnarfjarðarhafnar. „Samhliða vélaviðgerð hefur verið unnið sleitulítið að degi til við að rústberja lestarhlera skipsins.“

Gerðar voru hávaðamælingar en Heilbrigðiseftirlitið kveðst ekki getað staðfest að hávaði hafi verið yfir mörkum þegar hann barst að Norðurbakka. Athafnasvæði Hafnarfjarðarhafnar sé hins vegar í mikilli nálægð við vestustu íbúðablokkirnar á Norðurbakka. „Ljóst er að hafnaryfirvöld verða að takmarka eins og kostur er að hávaðasöm starfsemi fari fram á þeim svæðum hafnarinnar sem liggja næst Norðurbakkanum.“

gar@frettabladid.is