Hundruð milljóna í akstursgjöld árlega

Ríkið hefur greitt rúmlega 1,6 milljarða króna í akstursgjald til starfsmanna sinna síðan árið 2010. Það ár voru um 655 milljónir greiddar út til meira en 5.000 ríkisstarfsmanna, en sú fjárhæð dróst saman árið eftir, þegar um 590 milljónir fóru í akstursgjald.

Samkvæmt upplýsingum frá fjármálaráðuneytinu skal greiða starfsmönnum fyrir ferðir á eigin bíl með akstursgjaldi, en að öðru leyti er stofnunum óheimilt að greiða starfsmanni fyrir akstur. Þá skýra áhrif tilmæla ríkisstjórnarinnar til forstöðumanna um uppsögn aksturssamninga að stórum hluta að upphæð akstursgjalds lækkaði milli áranna 2010 og 2011.

Síðan 1. júní síðastliðinn hefur akstursgjald miðast við 117 krónur á kílómetrann. Það var áður 111 krónur, en var hækkað miðað við vísitölu neysluverðs. Þetta þýðir til dæmis að einstaklingur sem keyrir fram og til baka til Akureyrar frá Reykjavík fær fyrir það tæpar níutíu þúsund krónur greiddar.

Keyri starfsmaður meira en tvö þúsund kílómetra á árinu, er akstursgjald umfram það skattlagt sem tekjur.

Sérstök ferðakostnaðarnefnd ákvarðar akstursgjaldið, sem er greitt til ríkisstarfsmanna vegna aksturs á eigin bifreiðum þegar þeir eru að sinna starfi sínu á vegum ríkisstofnana.

Runólfur Ólafsson, formaður Félags íslenskra bifreiðaeigenda (FÍB), segir 117 krónur ekki hátt gjald, sér í lagi ef miðað sé við styttri vegalendir.

„Ef þú ert að keyra innanbæjar tvo til þrjá kílómetra í hverri ferð, er þetta lítið," segir hann. „Hins vegar ef þú ert alltaf á langkeyrslu, sem fer betur með bílinn og kostnaður við allt er lægri, þá er hægt að líta öðruvísi á þetta."

Samkvæmt töflu FÍB er árlegur rekstrarkostnaður nýrra bíla 55 krónur á kílómetrann upp í 117 krónur. Talan fer eftir eignarári, verðflokki og þyngd ökutækja.

sunna@frettabladid.is