Samþykkt að fjölga deildum á Íslandsmótinu í knattspyrnu

Tillaga Leiknis og KB úr Breiðholti um að skipta 3. deild karla í tvær deildir og fjölga þar með um eina deild á Íslandsmótinu hefur verið samþykkt.

Tíu lið munu því skipa 3. deild karla og önnur lið spila í nýrri deild sem mun heita 4. deild karla. Alls verða því deildirnar á Íslandsmótinu fimm talsins.

Þó nokkur getumunur hefur verið á milli liða í 3. deild karla og er breytingin gerð til að bregðast við þeirri þróun.

Um lagabreytingatillögu var að ræða og þurfti því minnst 66,6 prósent atkvæða til að fá hana samþykkta.

Fleiri tillögur verða teknar fyrir á þinginu.