Weston: Veit ekki mikið um íslenska boltann

Rhys Weston, verðandi leikmaður KR, segir í viðtali við skoska fjölmiðla að hann sé spenntur fyrir því að takast á við nýja áskorun á Íslandi.

Weston er velskur varnamaður sem hefur verið fyrirliði skoska B-deildarliðsins Dundee FC í vetur. Hann er einn þeirra leikmanna sem fá ekki nýjan samning nú í sumar og því þurfti hann að leita á önnur mið.

Weston átti að spila með Dundee gegn Livingston í lokaumferð skosku B-deildarinnar á laugardaginn en hann verður í banni í leiknum.

Það gæti hins vegar vel verið að hann verði í hópnum hjá KR þegar liðið mætir Stjörnunni í fyrstu umferð Pepsi-deildar karla á sunnudaginn.

„Það yrði eins mikill viðsnúningur eins og hægt væri að ímynda sér ef ég myndi svo spila á sunnudaginn," sagði Weston. „En ég set það ekki fyrir mig að byrja strax að spila ef það er það sem stjóri KR vill."

„Ég hef fengið lítinn tíma til að velta þessu fyrir mér og þetta gerðist allt saman mjög hratt. Það verður mikið um að vera hjá mér næstu dagana en svona er fótboltinn í dag. Maður verður að vera við öllu búinn."

„Stundum er það hluti af lífi knattspyrnumannsins að ferðast á nýja staði. Ég er vanur því og hræðist það ekki."

„Ég veit ekki mikið um íslenskan fótbolta en þetta er nýr kafli á mínum fótboltaferli og ný áskorun. Ég er mjög spenntur fyrir því. Þegar maður fer til nýs félags vill maður byrja að spila um leið og er það einnig tilfellið nú."

„Dundee hefur reynst mér vel en það er tímabært að breyta til og byrja upp á nýtt."

Hann sagðist vera í nógu góðu formi til að spila heilt tímabil á Íslandi þrátt fyrir að hann sé nýbúinn að klára heilt tímabil í Skotlandi.

Weston er væntanlegur til landsins í dag.