50 milljónir gegn glæpastarfsemi

Allsherjar- og menntamálanefnd Alþingis beinir þeim tilmælum til innanríkisráðherra að undirbúa aðgerðaáætlun gegn skipulagðri glæpastarfsemi. Þá vill nefndin að 50 milljónir fari á fjáraukalög í heimild fyrir lögreglu til að starfrækja sérstakt rannsóknar- og aðgerðateymi gegn skipulagðri glæpastarfsemi og mansali.

Björgvin G. Sigurðsson, formaður nefndarinnar, segir að slíkt teymi hafi gefið góða raun og vilji standi til að halda því áfram. Hann segir tillögur nefndarinnar í góðu samræmi við óskir löggæsluyfirvalda í þessum efnum. „Þetta er líka yfirlýsing um að við tökum þessi mál alvarlega.“

Nefndin lagði tillöguna fram í mars og hefur nú afgreitt hana til annarrar umræðu, en allir nefndarmenn standa að henni.

„Þetta var afgreitt hratt og vel og í mikilli samstöðu og er ástæða til að fagna því, sérstaklega af því að það er mjög mikilvægt að lögreglunni séu áfram tryggðar fjárheimildir og aðstaða til að vinna kerfisbundið gegn uppgangi skipulagðrar glæpastarfsemi. Hennar gætir víða í samfélaginu eins og við sjáum meðal annars í alvarlegum atburðum innan fangelsa landsins sem utan,“ sagði Björgvin á þingi í gær.- kóp