Tæplega sextíu innflytjendur í gæsluvarðhald á tíu árum

Fimmtíu og átta einstaklingar hafa verið úrskurðaðir í gæsluvarðhald á grundvelli 29. greinar útlendingalaga á undanförnum tíu árum. Þetta kemur fram í svari Ögmundar Jónassonar innanríkisráðherra við fyrirspurn Birgittu Jónsdóttur, þingmanns Hreyfingarinnar.

Í umræddri lagagrein kemur meðal annars fram að „...ef útlendingur neitar að gefa upp hver hann er, rökstuddur grunur er um að útlendingur gefi rangar upplýsingar um hver hann er eða hann sýnir af sér hegðun sem gefur til kynna að af honum stafi hætta er heimilt að handtaka útlendinginn og úrskurða í gæsluvarðhald samkvæmt reglum laga um meðferð sakamála, eftir því sem við á. Einnig getur lögregla lagt fyrir hann að tilkynna sig eða halda sig á ákveðnu afmörkuðu svæði."

Sá sem lengst sat í gæsluvarðhaldi mátti dúsa þar í 118 daga. Í nokkrum tilfellum fengu umræddir aðilar samþykkta hælisvist á Íslandi en í öðrum tilfellum var hælisumsókn hafnað og voru umræddir aðilar þá sendir til heimaríkis eða þess ríkis sem ábyrgð bar á þeim samkvæmt Dyflinarreglugerð um flóttamenn.