HM 2011: Tólf lið af sextán komin áfram

Þó svo að enn eigi eftir að spila lokaumferð riðlakeppninnar á HM í Brasilíu hafa nú þegar tólf lönd tryggt sér sæti í 16-liða úrslitum keppninnar.

16-liða úrslitin fara fram á sunnudag og mánudag og á Ísland góðan möguleika á að vera eitt þeirra liða sem keppir þar en stelpunum dugir jafntefli gegn Kína í kvöld til að komast áfram. Ef Angóla vinnur Þýskaland klukkan 17.00 í dag er Ísland komið áfram, sama hvernig leikurinn við Kína fer síðar í kvöld.

Leikið var í C- og D-riðlum í gær en Vísir fer hér yfir stöðuna í öllum riðlum fyrir lokaumferðina í dag.

Lið sem eru komin áfram:

A-riðill: Noregur og Svarfjallaland.

B-riðill: Rússland (1. sæti), Spánn (2. sæti), Holland og Suður-Kórea.

C-riðill: Brasilía (1. sæti), Frakkland og Rúmenía.

D-riðill: Danmörk, Svíþjóð og Króatía.

Lið sem eiga enn möguleika:

A-riðill: Angóla, Þýskaland og Ísland.

B-riðill: Engin.

C-riðill: Japan og Túnis.

D-riðill: Fílabeinsströndin og Úrúgvæ.

Sjá úrslit og stöðuna í riðlunum.

A-riðill:

Noregur og Svartfjallaland eru þegar komin áfram en mætast í dag í hreinum úrslitaleik um efsta sæti riðilsins. Jafntefli dugir Noregi til að fara áfram sem sigurvegari riðilsins.

Angóla, Þýskaland og Ísland eru svo öll með fjögur stig og ljóst að eitt þeirra liða mun sitja eftir með sárt ennið eftir leiki dagsins. Angóla og Þýskaland mætast innbyrðis sem er gott fyrir Ísland sem mætir Kína í kvöld. Kína er án stiga í riðlinum en hefur sýnt að það getur vel staðið í sínum andstæðingum.

B-riðill:

Rússland hefur þegar tryggt sér efsta sæti riðilsins og Spánn annað sætið. Holland og Suður-Kórea mætast svo í úrslitaleik um þriðja sætið í dag en bæði lið eru þó örugg áfram í 16-liða úrslitin.

Kasakstan endar í fimmta sæti riðilsins og Ástralía því neðsta. Leikur Holland og Suður-Kóreu er því sá eini sem hefur einhverja þýðingu í dag.

C-riðill:

Heimamenn í Brasilíu hafa komið skemmtilega á óvart með frábærri frammistöðu og glæsilegum sigri á Frökkum í fyrradag. Þeim sigri fylgdu þær eftir með góðum sigri á Rúmeníu í gær en með honum tryggðu Brassar sér sigurinn í riðlinum.

Frakkland (6 stig) og Rúmenía (5 stig) mætast svo í hreinum úrslitaleik um annað sætið í dag.

Japan fór langleiðina með að tryggja sér sæti í 16-liða úrslitunum með sigri á Túnis í gær, 32-31, og dugir stig gegn Kúbverjum í dag til að koma sér áfram. Sannarlega glæsilegur árangur hjá Japönum sem var í neðsta styrkleikaflokki þegar dregið var í riðla, rétt eins og íslenska liðið.

D-riðill:

Danir eru með fullt hús stiga, átta talsins, í D-riðli en eiga leik gegn Svíum í kvöld. Svíþjóð og Króatía eru bæði með sex stig en liðin mættust í gær og höfðu þá Króatar betur í hörkuleik, 27-26. Öll þrjú lið eru komin áfram í 16-liða úrslitin.

Annað hvort Fílabeinsströndin eða Úrúgvæ fylgja svo með í 16-liða úrslitin en liðin eru bæði með tvö stig og mætast í kvöld. Fílabeinsströndin er með miklu betra markahlutfall og dugir því jafntefli í kvöld.