Innlent

Svæsið geðrof gerði Gunnar Rúnar ófæran um að stjórna gerðum sínum

Jón Hákon Halldórsson skrifar
Mynd/Vilhelm
Svæsið geðrof varð til þess að Gunnar Rúnar Sigurþórsson varð ófær um að stjórna gerðum sínum, sagði Guðrún Sesselja Arnardóttir, verjandi Gunnars Rúnars, í málflutningi fyrir Héraðsdómi Reykjaness í dag. Máli sínu til stuðnings benti hún á vitnisburð þriggja geðlækna sem hafa borið vitni fyrir dómi. Hún fer frammá sýknu í málinu.

Aðalmeðferð hefur staðið yfir frá því klukkan rétt rúmlega níu í morgun. Játning Gunnars Rúnars í málinu stendur en Gunnar vildi að öðru leyti ekki tjá sig um sakargiftir í morgun og yfirgaf dóminn fljótlega.

Í málflutningi saksóknara kom fram að þótt geðlæknarnir þrír væru sammála um að Gunnar Rúnar væri ósakhæfur væru forsendur þeirra fyrir þeirri niðurstöðu ólíkar. Benti hún á að í matsgerð Helga Garðars Garðarssonar geðlæknis hefði hann komist að þeirri niðurstöðu að Gunnar Rúnar væri tvískiptur persónuleiki. Það komi hins vegar ekki fram í yfirmatsgerð Tómasar Zoega og Kristins Tómassonar geðlækna. Guðrún Sesselja benti hins vegar á að þó að ekkert komi fram í yfirmatsgerðinni um tvískiptan persónuleika sé ekki þar með sagt að þeir séu ósammála þeirri skýringu Helga Garðars.

Guðrún Sesselja segir að ýmilsegt í hegðun Gunnars Rúnars bendi til þess að hegðun hans hafi verið óskipulögð. Hann hafi til dæmis gengið langan spöl með plastpoka á skónum sínum áður en hann losaði pokana undan skónum. Hann hefði heldur ekki losað sig við skóna sína. Jafnframt benti Guðrún Sesselja á það að sú rólega hegðun sem Gunnar Rúnar hefði sýnt fyrst eftir að voðaatburðirnir áttu sér stað og fyrst eftir að hann var handtekinn bendi kannski til þess að ekki hafi verið allt með felldu hjá honum.

Guðrún Sesselja sagði að hin síðari ár hefðu dómarar farið eftir áliti sérfræðinga. Hún krafðist því sýknu fyrir hönd skjólstæðings síns en vægustu mögulegu refsingu til vara. Ákæruvaldið krefst hins vegar ítrustu refsingar en til vara að Gunnar Rúnar muni sæta vistun á viðeigandi stofnun.






Tengdar fréttir

Fór að huga að morði eftir gerð YouTube myndbandsins

Hugmynd Gunnars Rúnars Sigurþóssonar um að losna við Hannes Þór Helgason virðist hafa sprottið upp eftir að hann setti myndband á YouTube með ástarjátningu til hennar til unnustu Hannesar. Þetta kom fram í máli Tómasar Zoega geðlæknis sem gerði yfirmat á Gunnari Rúnari Sigurþórssyni ásamt Kristni Tómassyni geðlækni.

Deilt um sakhæfi Gunnars Rúnars

Í máli ákæruvaldsins gegn Gunnari Rúnari Sigurþórssyni er aðallega deilt um sakhæfi Gunnars, sagði Sigríður Elsa Kjartansdóttir saksóknari í málflutningi sínum fyrir Héraðsdómi Reykjaness í dag. Vitnaleiðslur báru þessa klárlega merki í dag, enda voru fjögur vitni og þar af þrír geðlæknar. Gunnar Rúnar hefur játað morðið á sig á fyrri stigum þess og vildi ekki bæta neitt við þann framburð í dag.

Aðkoman á morðstað föst í huga Hildar

„Mér líður ógeðslega illa - persónan sem ég var er bara horfin," sagði Guðlaug Matthildur Rögnvaldsdóttir, unnusta Hannesar Þórs Helgasonar, við vitnaleiðslur í héraðsdómi í morgun. Guðlaug Matthildur, sem kölluð er Hildur, var niðurlút þegar hún gekk inn í dómssalinn.

Gunnar Rúnar svarar engu - víkur úr dómsal

Gunnar Rúnar Sigurþórsson svarar engum spurningum við aðalmeðferð sem nú stendur yfir þar sem hann er ákærður fyrir að hafa orðið Hannesi Þór Helgasyni að bana. Lögmaður Gunnars, Guðrún Sesselja Arnardóttir, tilkynnti við upphaf aðalmeðferðarinnar í morgun að hann myndi nýta sér rétt sinn til að svara engum spurningum heldur aðeins staðfesta lögregluskýrslur. Gunnar Rúnar óskaði eftir að víkja úr dómsal á meðan aðalmeðferðin stendur yfir, utan þess þegar hann staðfestir lögregluskýrslur, og var orðið við þeirri beiðni. Að þessu loknu var gert stutt hlé á þinghaldi en næst á dagskrá er skýrslutaka af geðlæknum.

Djúpstæð sektarkennd vegna morðsins

Gunnar Rúnar Sigurþórsson þroskaðist eðlilega sem ungt barn en varð fyrir hörmulegu áfalli þegar faðir hans svipti sig lífi. Þetta sagði Helgi Garðar Garðarsson geðlæknir sem gerði geðrannsókn á Gunnari Rúnari eftir að hann var handtekinn vegna morðsins á Hannesi Þór Helgasyni í ágúst. Helgi Garðar bar vitni í dómnum í morgun. Helgi Garðar telur Gunnar Rúnar vera ósakhæfan og vill að hann sæti öryggisgæslu.

Erfiður morgunn fyrir fjölskyldu Hannesar

„Það hefur verið erfitt fyrir þá sem sitja í dómsalnum að hlusta á óhugnanlegar lýsingarnar á morðinu. Ekki síst fyrir fjölskyldu, vini og aðstandendur Hannesar. Þetta hefur verið erfiður morgunn,“ sagði fréttamaðurinn Andri Ólafsson, í viðtali við Bylguna í hádeginu, þar sem hann lýsti andrúmsloftinu í réttarhöldunum yfir Gunnar Rúnari Sigurþórssyni.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið