Veggjöld forsenda fyrir Vaðlaheiðargöngum

Vaðlaheiðargöng verða ekki til nema þau verði framkvæmd með veggjöldum, sagði Ögmundur Jónasson, ráðherra samgöngumála, á opnum fundi í umhverfis- og samgöngunefnd Alþingis í morgun.

Ögmundur sagði að ef Vaðlaheiðargöngin væru á samgönguáætlun þá væru þau aftarlega í röðinni. Brýnna væri að ráðast í kaup nýrrar Vestmannaeyjaferju, gerð Norðfjarðarganga, Dýrafjarðarganga og ráðast í framkvæmdir á Suðurlandi. Með því að taka Vaðlaheiðargöng út úr samgönguáætluninni og fjármagna hana með sértækum aðgerðum væri hægt að flýta gerð ganganna.

Ögmundur sagði jafnframt að það væri af og frá að veginum um Víkurskarð yrði lokað ef göngin um Vaðlarheiði yrðu að veruleika. „Ég tel að kosturinn við Vaðlaheiðagöng sé einmitt valið. Þú átt kost á því að fara aðra leið," sagði Ögmundur. Ein þeirra er Víkurskarðið. Ögmundur benti á að þetta væri sambærilegt við Hvalfjarðargöngin. Þar ættu menn kost á því að fara annað hvort Hvalfjörðinn eða keyra í gegnum Hvalfjarðargöng.