Guðmundur að missa pólskan landsliðsmann

Pólverjinn Grzegorz Tkaczyk þekkir það orðið vel að spila undir stjórn íslensks þjálfara en það mun breytast núna því kappinn er á heimleið.

Tkaczyk spilar nú undir stjórn Guðmundar Guðmundssonar hjá Rhein-Neckar Löwen en hann er samkvæmt pólskum fjölmiðlum búinn að gera þriggja ára samning við pólska liðið Vive Kielce.



Grzegorz Tkaczyk lék á sínum tíma undir stjórn Alfreðs Gíslasonar hjá Magdeburg en hann kom þangað frá pólska liðinu Warszawianka árið 2002. Hann er 30 ára leikstjórnandi sem hefur verið einn af aðalmönnunum á bak við velgengni pólska landsliðsins undanfarin ár.

Tkaczyk hefur spilað með Rhein-Neckar Löwen frá árinu 2007 en mun nú fara til Bogdan Wenta sem þjálfar einnig pólska landsliðið. Tkaczyk klárar tímabilið með þýska liðinu en fer síðan yfir til Póllands.