HM 2011: Miklir yfirburðir í D-riðli

Tveimur umferðum er nú lokið í öllum riðlum á heimsmeistaramótinu í handbolta sem nú fer fram í Brasilíu. Evrópuliðin þrjú hafa ótrúlega yfirburði í D-riðli og nánast örugg með sæti í 16-liða úrslitunum.

Króatía, Danmörk og Svíþjóð hafa öll unnið fyrstu leiki sína í D-riðli og það með miklum yfirburðum. Króatía vann til að mynda 30 marka sigur á Úrúgvæ í gær, 45-15.

Danmörk og Króatía mætast svo í spennandi leik í kvöld en Svíar ættu að eiga sigurinn vísan gegn Úrúgvæum.

Í C-riðli eru líka þrjú lið, Frakkland, Brasilía og Rúmenía, einnig með fullt hús stiga eftir fyrstu tvo leikina og því í mjög góðri stöðu fyrir 16-liða úrslitin. Fjögur efstu liðin í hverjum riðli komast áfram upp úr riðlakeppninni.

Af hinum liðunum í C-riðli virðist Túnis vera með sterkasta liðið en Túnisar hafa tapað sínum leikjum með talsvert minni mun en Kúbverjar og Japanar, sem munu af öllum líkindum enda í tveimur neðstu sætunum og taka þar með þátt í hinum svokallaða Forsetabikar.

Túnis mætir einmitt Kúbu síðar í dag og mun mikið ráðast af þeim leik. Japan var í neðsta styrkleikaflokki þegar dregið var í riðla og á erfiðan leik gegn Rúmeníu í kvöld.

En baráttan mun einnig standa um efstu sæti riðilsins þar sem í húfi er þeim mun auðveldari andstæðingur í 16-liða úrslitum keppninnar. Frakkland og Brasilía mætast þar í mikilvægum leik en heimamenn ætla sér að ná langt í keppninni.

Það er spilað í öllum riðlum í kvöld en spennan er aðeins meiri í A- og B-riðlunum. Ísland er í A-riðli og á erfiðan leik gegn Noregi í kvöld en forvitnilegt verður að sjá hvort að Angóla nái að stríða sterku liði Svartfjallalands, sem Ísland reyndar vann um helgina. Stelpurnar okkar töpuðu svo fyrir Angóla á sunnudaginn, sem kunnugt er.

Í B-riðli mæta heimsmeistarar Rússland liði Ástralíu, sem verður væntanlega að teljast lakasta lið keppninnar. Hollendingar ættu að hafa betur gegn Kasökum og þá mætast Spánverjar og Suður-Kóreumenn.

Sjá hér yfirlit yfir leiki dagsins.