Þjálfari Kínverja stýrir bara með flautunni

Æfingar kínverska landsliðsins hér í Santos hafa vakið mikla athygli. Xindong Wang, þjálfari liðsins, notar ekki röddina til þess að stjórna leikmönnum á æfingum.

Hann notar dómaraflautu og hún þagnar varla meðan á æfingunni stendur. Wang sýndi einnig í fyrrakvöld að hann er skapmikill.

Eftir 23-22 tapleik Kína gegn Þýskalandi missti hann algjörlega stjórn á sér – og það voru aðstoðarmenn hans sem fengu „hárblásarameðferðina“ hjá Wang.

Í stöðunni 23-22 fengu Kínverjar ákjósanlegt færi til þess að jafna, og skiptu þeir markverðinum út af til þess að fjölga í sókninni. Aðstoðarmenn Wang gleymdu hins vegar að klæða útileikmanninn í þar til gert vesti áður en hann fór inn á.

Leikmaðurinn fékk því tveggja mínútna brottvísun og Kínverjar voru einum færri síðustu 10 sekúndur leiksins. Ótrúlegt klúður.