Utan vallar: Fleiri leikmenn þurfa að fara í sterkari deildir

Íslenska kvennalandsliðið í handbolta er í fyrsta sinn í sögunni í úrslitum heimsmeistaramótsins hér í Brasilíu. Þegar þetta er skrifað hefur Ísland leikið þrjá leiki, unnið einn og tapað tveimur. Það er stórt afrek fyrir litla Ísland að vera með lið í þessari keppni. Stelpurnar okkar eru búnar að stimpla sig inn á meðal 24 bestu þjóða heims og það tekur enginn af þeim.

Það er augljóst að það er verk að vinna fyrir íslenskar handboltakonur, sé tekið mið af fyrstu þremur leikjunum. Það vantar hraða og styrk í liðið. Og það má leiða að því líkur að of margir leikmenn fái ekki nógu mörg verkefni við hæfi í deildarkeppninni á Íslandi. Fleiri leikmenn þurfa að komast í betri deildarkeppni, líkt og þróunin hefur verið hjá karlalandsliðinu undanfarna áratugi.

Því miður er deildarkeppnin á Íslandi með þeim hætti að flestir bestu leikmennirnir eru hjá 2-3 liðum. Samkeppnin er því ekki alltaf mikil og það er ókostur.

Æfingin skapar meistarann og það þurfa íslenskar handboltakonur að hafa í huga líkt og aðrir afreksíþróttamenn. Það þarf að auka æfingamagnið, leggja meira á sig og nálgast þannig þær þjóðir sem eru okkur framar í dag. Það er ekki hægt að stytta sér leið að markmiðinu.

Lið Íslands er ungt að árum. Leikmenn sem eru enn í framhaldsskóla og nokkrir rétt skriðnir yfir tvítugt. Þetta lið á bara eftir að vaxa og eflast á næstu misserum. Og það eru miklar líkur á því að þetta lið komist á fleiri stórmót á allra næstu árum.

Forráðamenn Handknattleikssambands Íslands eru án efa stoltir af þeim árangri sem A-landslið Íslands hafa náð á undanförnum árum. Karlalandsliðið hefur verið í fremstu röð í mörg ár og konurnar eru smátt og smátt að hækka flugið í alþjóðlegum handbolta.