Munu hittast eftir helgi og fara yfir stöðu mála

„Við höfum reiknað með að þetta yrði samþykkt en nú eru þær forsendur breyttar," segir Vilhjálmur Egilsson, framkvæmdastjóri Samtaka atvinnulífsins, aðspurður um hans viðbrögð við fyrstu tölum úr þjóðaratkvæðagreiðslunni en samkvæmt þeim hafnar meirihluti þjóðarinnar Icesave-samningnum.

Hann segir að aðilar vinnumarkaðsins muni hittast á mánudaginn og fara yfir stöðu mála. „Það er svo sem ekkert óvænt í þessu í sjálfu sér," segir Vilhjálmur og bendir á að skoðanakannanir hafi bent til þess að þetta yrði niðurstaðan.

Hann hefur sagt að með því að hafna samningnum gæti það haft áhrif á atvinnulífið, lánafyrirgreiðslur og lánshæfismat. En eins og fyrr segir, munu aðilar vinnumarkaðsins hittast á mánudaginn og fara yfir stöðu mála.