Traust á Jóhönnu fellur úr 64 í 17 prósent

Verulega hefur dregið úr trausti almennings á Jóhönnu Sigurðardóttur forsætisráðherra og Steingríms J. Sigfússonar fjármálaráðherra samkvæmt skoðanakönnun MMR.

Alls segjast 16,9 prósent treysta Jóhönnu í nýrri könnun MMR, en 23,9 prósent báru traust til hennar í síðustu könnun, sem gerð var í maí í fyrra. Fallið er þó mun hærra ef farið er lengra aftur, en 63,6 prósent treystu Jóhönnu í sambærilegri könnun sem gerð var í desember 2008.

Traust almennings á Steingrími J. Sigfússyni fjármálaráðherra hefur einnig minnkað. Nú segjast 22,3 prósent bera traust til Steingríms, en 37,6 prósent sögðust treysta honum í maí í fyrra.

Traust á Ólafi Ragnari Grímssyni, forseta Íslands, eykst hins vegar milli kannana, og nálgast nú það sem var árið 2008. Nú segjast 41,7 prósent þeirra sem afstöðu tóku treysta forsetanum, en 26,7 prósent treystu honum í maí í fyrra.

Traust almennings á Bjarna Benediktssyni, formanni Sjálfstæðisflokksins, eykst milli kannana. Um 19,1 prósent segist treysta honum nú, en 13,8 prósent treystu honum í síðustu könnun.

Litlar breytingar hafa orðið á trausti almennings á Sigmundi Davíð Gunnlaugssyni, formanns Framsóknarflokksins. Alls segjast 15,3 prósent treysta honum nú, svipað hlutfall og í maí í fyrra.

Könnunin var síma- og netkönnun, gerð 8. til 11. mars. Alls tóku 902 þátt í könnuninni.- bj