Vísar jafnréttiskvörtun til flokkanna

Ásta Ragnheiður Jóhannesdóttir, forseti Alþingis, vísar kvörtun Jafnréttisráðs um kynjahlutfall í landskjörstjórn til flokkanna.

Jafnréttisráð lýsti nýlega yfir undrun á því að jafnréttisjónarmið hefðu ekki verið höfð að sjónarmiði þegar fjórir karlar og og ein kona voru kosin í landskjörstjórn. Ráðið undrast á því að Alþingi gangi með þessu gegn anda jafnréttislaga og vill að kosningin verði endurtekin. Þá er skorað á þingforseta að sjá til þess að slíkt endurtaki sig ekki.

Ásta Ragnheiður segir, í svari við fyrirspurn Fréttablaðins, að landskjörstjórn sé kosin á Alþingi, en ekki skipuð. Á því sé grundvallarmunur. Stjórnmálaflokkarnir bjóði fram fulltrúa sína á framboðslistum og Alþingi kjósi stjórnina.

Ásta bætir því við að þó sé gott að Jafnréttisráð sé á vaktinni.

„En það hlýtur að sjálfsögðu að vita að um kosningar gilda ekki ákvæði laga um skipan í nefndir, stjórnir og ráð hins opinbera.“

Ásta segir að lokum að ekki standi á forseta Alþingis að hvetja til jafnréttis á öllum vígstöðvum.

„En hann getur ekki stjórnað því hverja flokkarnir bjóða fram á framboðslistum sínum í kosningum, þó að hann geti hvatt til að kynjaskipting á framboðslistum sé sem jöfnust.“- þj