Bernhöftsbakarí er að missa Bergstaðastræti

„Mér finnst að fólkið hér í hverfinu eigi það skilið að við gefumst ekki upp svo auðveldlega,“ segir Sigurður Már Guðjónsson, bakarameistari í Bernhöftsbakaríi á Bergstaðastræti 13. Eigandi hússins tilkynnti á þriðjudag að bakaríið yrði að vera á braut í síðasta lagi um áramót.

Bernhöftsbakarí hefur verið á Bergstaðastræti í 79 ár, þar af 28 ár í núverandi leiguhúsnæði. Tíu ára leigusamningur rennur út um áramótin og ekki hefur samist um áframhaldandi leigu. Frá árinu 2005 hefur húsið skipt nokkuð ört um hendur. Eftir hrun komst húsið í eigu Íslandsbanka, sem seldi það núverandi eiganda, verktakafyrirtækinu Mótamönnum.

Með kaupunum á Bergstaðastræti 13 fylgdi byggingarréttur að íbúðum á lóðinni og hafa þær verið í smíðum. Samhliða var gerður samningur um að félag í eigu eigenda Bernhöftsbakarís myndi kaupa og Mótamenn selja þann hluta hússins sem bakaríið er í og hluta af nýbyggingunni að auki. Tafir hafi orðið á framkvæmdum og viðskiptin hafa ekki gengið eftir. Nýbyggingin hefur ítrekað verið í fréttum vegna þess að kveikt hefur verið í henni hálfkláraðri. Samkvæmt upplýsingum Fréttablaðsins hefur lögregla nú undir höndum ljósmynd af manni sem grunaður er um íkveikju í húsinu síðastliðinn þriðjudag.

Sigurður sér fram á breytta tíma í fjölskyldufyrirtækinu sem afi hans keypti árið 1944. „Þetta er ekki bara bakarí heldur fólkið sem vinnur hérna. Starfsfólkið hefur orðið andvaka og stelpurnar jafnvel farið að gráta. Fólk er hrætt við að missa vinnuna,“ segir Sigurður, óviss um hvað eigi til bragðs að taka. Bakaríinu hafi ekki gefist kostur á áframhaldandi leigu. „Viðskiptavinirnir eru yfir sig hneykslaðir og þeir standa með bakaríinu. Það er bara ljóst að við ætlum að berjast.“

Guðmundur Már Ástþórsson, húsasmíðameistari og einn þriggja eigenda Mótamanna, var á Bergstaðastræti í gær þar sem unnið var að því að eldverja í nýbyggingunni. Hann sagði húsnæðismál Bernhöftsbakarís í raun og veru í höndum eigenda þess. Forsvarsmenn bakarísins hefðu ekki sinnt endurteknum erindum um viðræður eða borið sig eftir nýjum leigusamningi. Því hefði ekki verið um annað að ræða af hálfu Mótamanna en að minna á að leigusamningurinn rynni út um áramót.

„En bakaríið er enn með málið í sínum höndum því það er með samning til áramóta sem gefur því rétt til að kaupa húsnæðið. En þótt Bernhöftsbakarí fari verður húsnæðið ekki tómt. Þar verður áfram svipuð starfsemi,“ segir Guðmundur Már Ástþórsson.

gar@frettabladid.is