Ungverjaland vann fleiri leiki en Ísland

Það skiptir miklu máli á HM í handbolta að vinna réttu leikina. Það sýndi sig hjá íslenska landsliðinu þar sem að liðið tapaði fleiri leikjum en Ungverjaland en varð samt sæti ofar í sjálfri keppninni.

Ungverjaland vann í gær sigur á Pólverjum í leik um 7. sæti mótsins á meðan að Ísland tapaði fyrir Króatíu í leik um 5. sætið.

Bæði lið unnu höfðu unnið jafn marga leiki fyrir gærdaginn en þar sem að Ísland hafði betur gegn Ungverjalandi í fyrsta leik riðlakeppninnar fékk Ísland að spila um fimmta sætið en Ungverjaland það sjöunda.

Pólland (8. sæti) og Noregur (9. sæti) unnu fimm leiki í allri keppninni þegar uppi var staðið, jafn marga og Ísland.

Ísland vann alls fimm leiki í Svíþjóð - alla í B-riðli. Strákarnir okkar töpuðu svo öllum leikjunum í milliriðlakeppninni sem og leiknum gegn Króatíu í röð.

Þess skal þó getið að Ísland mætti gríðarlega sterkum liðum á lokasprettinum - ekkert nema heimsmeistaraliðum. Frakkland er ríkjandi heimsmeistari, Þýskaland varð heimsmeistari árið 2007, Spánn 2005 og Króatía 2003.

Sigrarnir gegn Ungverjalandi og Noregi reyndust Íslandi gríðarlega mikilvægir og dugðu til þess að koma liðinu í hóp þeirra þjóða sem tryggðu sér sæti í undankeppni Ólympíuleikanna í Lundúnum árið 2012.

En eins og heyra mátti á viðbrögðum leikmanna eftir leikinn gegn Króatíu í gær var niðurstaðan í mótinu heldur súrsæt - árangurinn hafi verið frábær en vonbrigðin engu að síður mikil.



Sigurleikir Ungverja (7. sæti)

26-23 gegn Noregi í B-riðli

36-24 gegn Brasilíu í B-riðli

28-24 gegn Japan í B-riðli

32-30 gegn Austurríki í B-riðli

27-25 gegn Þýskalandi í milliriðli 1

31-28 gegn Póllandi í leik um 7. sætið

Sigurleikir Póllands (8. sæti)

35-33 gegn Slóvakíu í D-riðli

24-23 gegn Argentínu í D-riðli

38-23 gegn Síle í D-riðli

25-20 gegn Suður-Kóreu í D-riðli

27-26 gegn Serbíu í milliriðli 2

Sigurleikir Norðmanna (9. sæti)

35-29 gegn Japan í B-riðli

33-27 gegn Austurríki í B-riðli

26-25 gegn Brasilíu í B-riðli

35-25 gegn Þýskalandi í milliriðli 1

32-31 gegn Serbíu í leik um 9. sætið

Fleiri þjóðir:

Serbía (10. sæti) vann 3 leiki af 9 (og gerði eitt jafntefli)

Þýskaland (11. sæti) vann 4 leiki af 9

Argentína (12. sæti) vann 3 leiki af 9